有日，有位小姐到診所登記:姑娘，可唔可以俾我睇先？我個肚好痛！
我:唔好意思呀小姐，排你前面嘅發高燒…好快到你㗎啦，等兩個啫～
幸好小姐好明白事理，乖乖行去坐低等…
正當佢準備坐低，屁股向下壓嗰下…「呠～ssssssssssssssssssssssssss」…
世界停頓咗，佢嘅pose hold住咗，我同病人都呆蛋咗，大家嘅視線一齊望向同一方向…
本身大家都冇乜嘢，諗住尷尷尬尬望吓就算，不過小姐慘叫咗一聲:呀～～
嗰刻我知道，佢應該唔係放咗一個乾屁咁簡單…
嗯，係呀，好不幸，佢粉紅色嘅褲仔添上色彩了。
小姐:姑娘，你有冇褲呀？
我:…冇呀…
小姐唔知點解突然將佢嘅不幸化成怒氣遷怒於我身上:我都叫咗你俾我睇先㗎啦！你而家搞到我咁啦！你至少俾條褲我換咗先呀！離哂譜！
其中一個病人多口:自己瀨屎都關姑娘事？
小姐繼續同我講:你俾條褲我換咗先啦！
我:唔好意思呀小姐，我哋真係冇褲可以俾你…
小姐:你唔係要我咁呀？你試吓咁呀！你會點呀！你喺我角度諗吓啦！
如果係我，我會想搵窿捐…
我:你等等啊～
我行入去醫生房問:醫生，你有冇唔要嘅醫生袍啊？
醫生:你睇吓櫃入面有冇～
我拎住件醫生袍出去:小姐，一係你笠住呢件先，遮住先，到時再出去買褲…
小姐望住件oversize袍表示不滿:咁騎呢點著出去呀？你哋褲都冇條呀？真係好麻煩！咁著出去咪仲礙眼！你喺我角度諗吓呀！
食排油丸，係屁都唔放得㗎baby～成日漏油㗎～～好好好好好麻煩㗎～～
(而家應該唔興排油丸啦嘛？又到食月餅嘅時候，令我諗起漏油蛋黃月餅添～呼)
Search